Húsnæðismálin í Kópavogi, einsleitni eða fjölbreytni

Þróun húsnæðismála í Kópavogi hefur verið afar einsleit á undanförnum árum undir stjórn Sjálfstæðisflokks og meðreiðarsveina. Undanfarin átta ár hafa allar tillögur Samfylkingarinnar um fjölbreytni í húsnæðismálum verið felldar. Eingöngu hafa verið byggð fjölbýlishús, flest með bílageymslu sem gerir íbúðirnar dýrar sem hentar ekki ungu fólki. Kaupendur íbúðanna er fólk á miðjum aldri og eldra. Unga fólkið er útilokað vegna þess að fjölbreytni vantar í húsnæðisstefnuna. Engar námsmannaíbúðir eru til í Kópavogi. Námsmenn úr Kópavogi verða að flytja til Reykjavíkur eða Hafnarfjarðar vilji þeir búa í námsmannaíbúð. Slíkt er ömurlegt hlutskipti.

Skaðleg stefna Sjálfstæðisflokks og Framsóknar

Á nýbyggingasvæðum og þéttingareitum í Kópavogi eru börn á grunnskólaaldri aðeins 5% íbúa en 15% íbúa í öllum öðrum hverfum. Fjölgun eldri borgara í Kópavogi er mun meiri en í öðrum sveitarfélögum. Þarna leikur einsleit úrelt húsnæðisstefna Sjálfstæðisflokksins lykilhlutverk. Það versta er að þessi niðurstaða er skaðleg fyrir framtíðarþróun Kópavogs. Sveitarfélög án ungs fólks eiga sér dapra framtíð. Og Framsóknarflokkurinn dinglar með, samþykkti allar tillögur Samfylkingarinnar um fjölbreytt húsnæði þegar flokkurinn var í minnihluta en fellir þær allar þegar hann er í meirihluta með Sjálfstæðisflokknum og þá löngu búinn að gleyma samvinnuhugsjóninni sem hann var stofnaður um.

Samfylkingin tryggir fjölbreytni

Eini kosturinn er að velja Samfylkinguna í kosningunum viljir þú tryggja fjölbreytni í húsnæðismálum.

Samfylkingin er eini flokkurinn sem hefur undanfarin átta ár komið reglulega fram með tillögur um fjölbreytni í húsnæði, tillögur sem alltaf hafa verið felldar.

Viljir þú tryggja námsmannaíbúðir í Kópavogi, viljir þú tryggja íbúðir fyrir ungt fólk, lágtekjufólk eða millitekjufólk, leiguhúsnæði eða eignarhúsnæði þá kýst þú Samfylkinguna – að sjálfsögðu

Pétur Hrafn Sigurðsson bæjarfulltrúi og skipar 18. sætið á lista Samfylkingarinnar í Kópavogi