Íþróttabærinn Kópavogur
Kópavogsbær er íþróttabær. Íþróttafélögin í Kópavogi eru lýðheilsusamtök og eru meðvituð um sitt mikilvæga samfélagslega hlutverk. Þau hafa verið í fremstu röð, hvert í sinni íþróttagrein. Mikið hefur verið byggt af íþróttamannvirkjum en viðhaldi þeirra er ábótavant. Samfylkingin vill langtímaáætlun um uppbyggingu og viðhald á íþróttamannvirkjum bæjarins þannig að ástand þeirra sé alltaf til fyrirmyndar.
Samfylkingin vill hækka íþrótta- og tómstundastyrk til barna og unglinga í Kópavogi þannig að allir eigi kost á að stunda íþróttir, tónlistarnám eða aðrar tómstundir óháð efnhag.
Samfylkingin vill fara í víðtæka stefnumótun í samvinnu við íþróttafélögin í bænum um hvert sé þeirra samfélagslega hlutverk og tryggja samstarf út frá þeirri stefnu sem skilgreind er í þeirri vinnu. Lykilspurningar í þeirri vinnu eru tvenns konar:
1) Hvernig tryggjum við að öllum börnum og unglingum í Kópavogi verði tryggt aðgengi að íþrótta- og tómstundastarfi þar sem hæfileikar hvers og eins njóti sín sem best?
2) Hvernig tryggjum við að Kópavogur eigi áfram afreksfólk á íþróttasviðinu enda eru slíkir aðilar afar mikilvægir sem fánaberar um gildi heilbrigðrar íþróttastarfsemi á vegum bæjarins?
Íþróttir og hreyfing fyrir eldri borgara er ekki síður mikilvæg en fyrir yngri kynslóðina. Því á bærinn - oft í samvinnu við íþróttafélögin - að skapa eldri borgurum aðstöðu til að stunda öflugt íþrótta- og tómstundastarf sem og heilsurækt í íþróttamannvirkjum bæjarins. Kynna þarf vel fyrir eldra fólki hvaða möguleikar eru í boði og bjóða upp á akstur í íþróttamannvirki á þeim tíma dags sem þeim hentar.
Samfylkingin vill endurskoða og bæta rekstrar- og þjónustusamninga við íþrótta- og tómstundafélög í Kópavogi til að gera þau betur í stakk búin til að veita Kópavogsbúum úrvalsþjónustu, hvort sem um er að ræða almennings- eða afreksíþróttir og stuðla þannig að bættri heilsu og líðan fólks á öllum aldri. Efla þarf starfsemi íþrótta- og tómstundafélaga eigi þau að geta unnið í aukinni samvinnu við frístund skólanna.
Til þess að halda við sterkri stöðu Kópavogs í þessum málaflokki þurfum við að:
Hækka íþrótta- og tómstundastyrk til barna og unglinga í Kópavogi.
Nýta húsnæði skólanna fyrir tómstundir og klúbbastarf barna og unglinga, svo sem leiklist, hönnun og tónlist. Mikilvægt er að nýta húsnæði skólanna sem sumt stendur autt á kvöldin.
Styðja þarf við afreksfólk í íþróttum þannig að við eignumst sterkar og góðar fyrirmyndir.
Bæta húsnæðismál þeirra íþróttafélaga og tómstundafélaga sem vantar úrræði, t.d. vegna mikillar eftirspurnar eftir þjónustu og langra biðlista.
Endurbyggja Kópavogsvöll þannig að hann verði löglegur til alþjóðlegrar keppni í knattspyrnu. Það er óásættanlegt að keppnislið úr Kópavogi geti ekki leikið í Evrópukeppni á heimavelli sínum og þurfi að leita í önnur bæjarfélög til þess.
Leysa húsnæðis- og vallaraðstæður fyrir HK í Kórnum þannig að ásættanlegt sé. Reisa þarf löglegan knattspyrnuvöll við Kórinn og bæta aðstöðu HK í samvinnu við stjórnendur félagsins.
Styðja við uppbyggingu GKG við endurhönnun golfvallarins og nauðsynlegrar aðstöðu þar.
Styðja íþróttafélögin í bænum til að halda stóra íþróttaviðburði, bæði innlenda og alþjóðlega. Afleidd störf af stórum íþróttamótum eru mörg.